Паэзія любові і святла
20.11.201320 лістапада раённая бібліятэка імя Яўгеніі Янішчыц сустракала гасцей,бо там адбылася ўрачыстая літаратурная вечарына, прысвечаная 65 - й гадавіне з дня нараджэння “палескай ластаўкі” Яўгеніі Янішчыц.
Сустрэча была адкрыта ансамблем інструментальнай музыкі з кампазіцыяй “Парэчча - парк”. У гэты дзень удзельнікі мерапрыемства інсцэніравалі ўрыўкі з паэм Яўгеніі Янішчыц, чыталі вершы паэткі, а таксама і свае ўласныя, якія прысвячалі ёй – “ясяльдзянцы”.
На свяце прагучала шмат прыгожых слоў у адрас знакамітай паэткі ад заслужанага дзеяча культуры РБ Дзям’яна Рыгоравіча Лемяшэўскага, рэдактара газеты “Палеская праўда” Віялеты Мікалаеўны Падлужнай, паэтаў Піншчыны, аднакурсніцы Тамары Пятроўны Аўсяннікавай, якая прыехала з горада Магілёва.
На сустрэчу прыехала і пляменніца паэткі – Ганчарык Таццяна Мікалаеўна, якая падзялілася з гасцямі сваімі пачуццямі, паведаміла цікавыя моманты біяграфіі паэткі.
Паэзія Яўгеніі Янішчыц карыстаецца заслужанай папулярнасцю не толькі ў літаратурным асяродку, але і ў самых шырокіх чытацкіх колах. Яна запаланяе чытача трывалымі маральна-этычнымі ўстоямі, магутнай духоўнай энергіяй, смуткам, трывогай, святлом. Для беларускай паэзіі яе адыход стаў незамянімай стратай… Але таленавітая паэзія “не знае тлёну”.